ماذا يحدث إذا تجاهلت حصوات المرارة؟

ماذا يحدث إذا تجاهلت حصوات المرارة؟
“قالولي دي حصوة صغيرة… وسيبها، مش هتعمل حاجة!”
لكن المفاجأة إن بعض الحصوات الصغيرة قد تكون أخطر من الكبيرة في بعض الحالات!
أولًا: لو الحصوات صغيرة
كتير من الناس يفتكر إن الحصوة الصغيرة آمنة… لكن أحيانًا العكس هو اللي بيحصل!
الحصوات الصغيرة ممكن تتحرك بسهولة وتدخل في القناة المرارية، وده ممكن يسبب:

• مغص مراري شديد.
• التهاب حاد في المرارة.
• انسداد بالقناة الصفراوية وظهور الصفراء.
• التهاب البنكرياس، وده من أخطر المضاعفات.

ثانيًا: لو الحصوة كبيرة
الحصوة الكبيرة غالبًا بتفضل داخل المرارة، لكن لو سببت أعراض متكررة ممكن تؤدي إلى:

• التهاب مزمن بالمرارة.
• تليف أو انكماش المرارة مع الوقت.
• ألم متكرر بعد الأكل، خصوصًا الوجبات الدسمة.
  وفي حالات نادرة جدًا، قد ترتبط الحصوات الكبيرة جدًا بزيادة خطر الإصابة بسرطان المرارة، خاصة إذا ظلت لسنوات مع التهاب مزمن.
  ثالثًا: لو الحصوات متعددة
  وجود أكثر من حصوة ممكن يزود فرصة انسداد القناة المرارية، وبالتالي يزيد احتمال حدوث:
• التهاب المرارة.
• انسداد القنوات الصفراوية.
• التهاب البنكرياس إذا وصلت حصوة للقناة المشتركة.
  إمتى لازم تروح للدكتور فورًا؟
  لو عندك:
• ألم شديد في أعلى يمين البطن مستمر أكتر من 6 ساعات.
• حرارة أو رعشة.
• اصفرار العين أو الجلد.
• قيء مستمر.
• بول غامق أو براز فاتح اللون.
  دي أعراض تستدعي تقييمًا طبيًا سريعًا.
  🩻 كيف يتم تشخيص حصوات المرارة؟
  لو الطبيب شك إن الأعراض بسبب المرارة، ممكن يطلب واحد أو أكتر من الفحوصات التالية:
  1- الموجات فوق الصوتية (Ultrasound)
  وده أول فحص يطلبه الطبيب لأنه سريع، متوفر، غير مؤلم، ودقته عالية جدًا في اكتشاف حصوات المرارة والتهابها.
  2- تحاليل الدم للاطمئنان على:
  وظائف الكبد ، نسبة الصفراء ، علامات الالتهاب (مثل كرات الدم البيضاء وCRP)و إنزيمات البنكرياس إذا كان فيه شك في التهاب البنكرياس.
  3- الأشعة المقطعية (CT Scan) ليست الفحص الأول للحصوات، لكنها مفيدة عند الاشتباه في وجود مضاعفات مثل:
  ثقب المرارة ، خراج ، التهاب البنكرياس ، أو إذا كان التشخيص غير واضح.
  4- الرنين المغناطيسي على القنوات المرارية (MRCP) يستخدم عندما يشك الطبيب في وجود حصوة داخل القناة المرارية الرئيسية، لأنه يرسم القنوات الصفراوية بدقة دون تدخل جراحي.
  5- منظار القنوات المرارية (ERCP) وده مش مجرد فحص، لكنه فحص وعلاج في نفس الوقت، لأنه يقدر يكتشف الحصوات الموجودة في القناة المرارية الرئيسية ويزيلها أثناء المنظار إذا لزم الأمر.

هل كل حصوة لازم تتشال؟
الإجابة: لا.
لو الحصوات مش عاملة أي أعراض، ففي حالات كتير بيكون الحل هو المتابعة فقط، إلا إذا كانت فيه ظروف خاصة يحددها الجراح.
أما لو الحصوات بتسبب مغص متكرر أو التهابات أو مضاعفات، فغالبًا بيكون العلاج هو استئصال المرارة بالمنظار، وليس مجرد إزالة الحصوات.

herbalbeautytips.net